博仔大戰牛蜱——暫養狗「阿黃」嘅除蟲記

講起都覺得自己論盡，但係呢件事真係太好笑，忍唔住要同大家分享。

上個月我接咗隻由地盤救返嚟嘅流浪狗「阿黃」返屋企暫養。佢成身都係牛蜱，初頭我以為只係十幾隻，點知獸醫檢查完話：「保守估計，二百隻。」我當場呆咗。

跟住嗰兩個星期，我每日放工返到屋企就係同佢捉牛蜱。用鉗仔一隻一隻咁抆，抆到我都覺得自己好似做緊工廠流水線咁。有一晚抆到凌晨兩點，我攰到攤喺地下，阿黃走過嚟舔咗我塊面一下，好似同我講「唔該曬」咁。雖然我好驚佢啲牛蜱會跳過嚟我度，但係嗰下真係心都甜曬。

最瘀嘅係，有一日我返公司開會，同事係咁望住我條頸，原來有隻牛蜱唔知幾時跳咗上我件衫度，仲爬咗上條頸度！我成個人大叫咗出嚟，成班同事笑到轆地。而家佢哋叫我「牛蜱博」，個花名應該會跟我一世。

阿黃而家好返曬喇，成身毛甩咗好多但係已經開始生返新毛。佢好乖好嗲，而家喺中心等人領養。如果有人唔介意佢曾經係「牛蜱王」，不妨嚟探嚇佢！